ರಾಜ್ಯದೆಲ್ಲೆಡೆ ವ್ಯಾಪಕ ಮಳೆಯಾಗುತ್ತಿರುವ ಹಿನ್ನೆಲೆಯಲ್ಲಿ ಬೆಸ್ಕಾಂ ವ್ಯಾಪ್ತಿಯಲ್ಲಿ ವಿದ್ಯುತ್‌ ಬೇಡಿಕೆ ಪ್ರಮಾಣ ಗಣನೀಯವಾಗಿ ತಗ್ಗಿದೆ. ಬೇಸಿಗೆಯಲ್ಲಿ ಸಾರ್ವಕಾಲಿಕ ದಾಖಲೆ ಬರೆದಿದ್ದ ವಿದ್ಯುತ್‌ ಬೇಡಿಕೆಯು ಪ್ರಸಕ್ತ ಜುಲೈ ತಿಂಗಳಲ್ಲಿ 6,954 ಮೆಗಾ ವ್ಯಾಟ್‌ ಆಜುಬಾಜಿಗೆ ಬಂದಿದೆ.
ಬೇಸಿಗೆಯ ತಾಪಮಾನ ತೀವ್ರವಾಗಿದ್ದ ಏಪ್ರಿಲ್‌ ಹಾಗೂ ಮೇ ತಿಂಗಳಿಗೆ ಹೋಲಿಸಿದರೆ ಬೆಸ್ಕಾಂ ವ್ಯಾಪ್ತಿಯಲ್ಲಿ ಸದ್ಯ ವಿದ್ಯುತ್‌ ಬೇಡಿಕೆಯು ಸುಮಾರು 1,500 ಮೆಗಾ ವ್ಯಾಟ್‌ನಷ್ಟು ಕಡಿಮೆಯಾಗಿದೆ. ಈಗ ಮಳೆಗೆ ಇಳೆ ತಂಪಾಗಿದ್ದು, ಗೃಹೋಪಯೋಗಿ ಮತ್ತು ಕೃಷಿ ವಲಯದಲ್ಲಿ ವಿದ್ಯುತ್‌ ಬಳಕೆ ಪ್ರಮಾಣ ಇಳಿಕೆಯಾಗಿದೆ.
ಬೆಸ್ಕಾಂ ವ್ಯಾಪ್ತಿಯ ಎಂಟು ಜಿಲ್ಲೆಗಳಲ್ಲಿ ಕೃಷಿ ಪಂಪ್‌ಸೆಟ್‌ ವಿದ್ಯುತ್‌ ಸಂಪರ್ಕಗಳ ಸಂಖ್ಯೆಯು 9.83 ಲಕ್ಷ ಇದೆ. ಕೈಗಾರಿಕಾ ಉದ್ದೇಶದ 1.78 ಲಕ್ಷ ಮತ್ತು ಗೃಹೋಪಯೋಗಿ ಉದ್ದೇಶದ 91.47 ಲಕ್ಷ ವಿದ್ಯುತ್‌ ಸಂಪರ್ಕಗಳಿವೆ. ಇಂಧನ ಇಲಾಖೆ ಲೆಕ್ಕಾಚಾರದ ಪ್ರಕಾರ, ರಾಜ್ಯದ ಒಟ್ಟಾರೆ ಬೇಡಿಕೆಯಲ್ಲಿ ಶೇ. 40ರಷ್ಟು ವಿದ್ಯುತ್‌ ಬೆಂಗಳೂರಿಗೇ ಬೇಕು.
ಬೇಸಿಗೆ ಆರಂಭದ ಬೆನ್ನಲ್ಲೇ ವಿದ್ಯುತ್‌ ಬೇಡಿಕೆಯು ಗಣನೀಯವಾಗಿ ಏರಿಕೆಯಾಗಿತ್ತು. ಏಪ್ರಿಲ್‌ನಲ್ಲಿ 8,381 ಮೆ.ವ್ಯಾ. ಮತ್ತು ಮೇ ತಿಂಗಳಲ್ಲಿ 8,444 ಮೆ.ವ್ಯಾ.ಗೆ ತಲುಪಿತ್ತು. ಅದೇ ರೀತಿ ದೈನಂದಿನ ಸರಾಸರಿ ವಿದ್ಯುತ್‌ ಬಳಕೆ ಪ್ರಮಾಣವು ಏಪ್ರಿಲ್‌ನಲ್ಲಿ 164 ದಶಲಕ್ಷ ಯೂನಿಟ್‌ಗೆ ಮತ್ತು ಮೇ ತಿಂಗಳಲ್ಲಿ 127 ದಶಲಕ್ಷ ಯೂನಿಟ್‌ಗೆ ಏರಿಕೆಯಾಗಿತ್ತು. ಬೆಸ್ಕಾಂ ಇತಿಹಾಸದಲ್ಲೇ ವಿದ್ಯುತ್‌ಗೆ ಈ ಪರಿ ಬೇಡಿಕೆ ಎಂದೂ ದಾಖಲಾಗಿರಲಿಲ್ಲ. ಆದರೆ, ಜೂನ್‌ನಿಂದ ಮಳೆಯ ಕಾರಣಕ್ಕೆ ವಿದ್ಯುತ್‌ ಬೇಡಿಕೆ ಮತ್ತು ಬಳಕೆ ಎರಡೂ ತಗ್ಗಿವೆ. ಸದ್ಯ ವಿದ್ಯುತ್‌ನ ಗರಿಷ್ಠ ಬೇಡಿಕೆಯು 6,954 ಮೆ.ವ್ಯಾ. ಮತ್ತು ಕನಿಷ್ಠ ಬೇಡಿಕೆಯು 2,896 ಮೆ.ವ್ಯಾ. ಇದೆ. ಮತ್ತೊಂದೆಡೆ ವಿದ್ಯುತ್‌ನ ದೈನಂದಿನ ಸರಾಸರಿ ಬಳಕೆ ಪ್ರಮಾಣವು 109 ದಶಲಕ್ಷ ಯೂನಿಟ್‌ಗೆ ಇಳಿದಿದೆ.
ಗೃಹೋಪಯೋಗಿ ಮತ್ತು ಕೈಗಾರಿಕಾ ಉದ್ದೇಶದ ಸಂಪರ್ಕಗಳಿಗಿಂತ ಕೃಷಿ ಪಂಪ್‌ಸೆಟ್‌ಗಳಿಗೆ ಅತಿ ಹೆಚ್ಚು ವಿದ್ಯುತ್‌ ಬಳಸಲಾಗುತ್ತದೆ. ಬೇಸಿಗೆಯಲ್ಲಿ ಕೃಷಿ ಪಂಪ್‌ಸೆಟ್‌ಗಳಿಗೆ ಬಿಡುವಿಲ್ಲದ ದುಡಿಮೆ. ಬೇಸಿಗೆ ಕಾರಣಕ್ಕೆ ಬೆಳೆಗಳಿಗೆ ನೀರುಣಿಸಲು ರೈತರು ಹೆಚ್ಚಾಗಿ ಪಂಪ್‌ಸೆಟ್‌ಗಳನ್ನು ಬಳಕೆ ಮಾಡುತ್ತಾರೆ. ಈಗ ಉತ್ತಮ ಮಳೆಯಾಗುತ್ತಿರುವ ಕಾರಣ ರೈತರು ಪಂಪ್‌ಸೆಟ್‌ಗಳನ್ನು ಬಳಕೆ ಮಾಡುವುದು ಗಣನೀಯವಾಗಿ ತಗ್ಗಿದೆ. ಕೃಷಿ ಚಟುವಟಿಕೆ ನಿಧಾನವಾಗಿ ಆರಂಭವಾಗುತ್ತಿರುವುದರಿಂದ ಕೃಷಿ ವಲಯಕ್ಕೆ ಸದ್ಯ ಹೆಚ್ಚಿನ ವಿದ್ಯುತ್‌ ಬೇಡಿಕೆ ಇಲ್ಲ. ಇನ್ನೂ ಕೆಲ ದಿನಗಳ ಕಾಲ ಮಳೆಯ ಅಬ್ಬರದ ಮುನ್ಸೂಚನೆ ಇದ್ದು, ವಿದ್ಯುತ್‌ ಬೇಡಿಕೆ ಮತ್ತಷ್ಟು ಕುಸಿಯಲಿದೆ. ಮಳೆಯ ಕಾರಣಕ್ಕೆ ರೈತರು ಪಂಪ್‌ಸೆಟ್‌ಗಳನ್ನು ಬಳಸುತ್ತಿಲ್ಲ. ಇದರಿಂದ ವಿದ್ಯುತ್‌ ಬಳಕೆ ತಗ್ಗಿದೆ. ಮತ್ತೊಂದೆಡೆ ಗೃಹೋಪಯೋಗಿ ವಿದ್ಯುತ್‌ ಬಳಕೆ ಪ್ರಮಾಣವೂ ಕಡಿಮೆಯಾಗಿದೆ ಎಂದು ಬೆಸ್ಕಾಂ ಅಧಿಕಾರಿಗಳು ತಿಳಿಸಿದ್ದಾರೆ.
ಈ ಬಾರಿ ಬೇಸಿಗೆಯ ಬೇಗೆ ನಗರವಾಸಿಗಳನ್ನು ಹೈರಾಣಾಗಿಸಿತ್ತು. ಮಾರ್ಚ್ ಮತ್ತು ಮೇ ತಿಂಗಳಲ್ಲಿ ಬೆಂಗಳೂರಿನ ತಾಪಮಾನವು 35 ಡಿಗ್ರಿ ದಾಟಿತ್ತು. ಬಿಸಿಲ ಝಳದಿಂದ ಬಸವಳಿದಿದ್ದ ಜನರು ದಿನದ 24 ತಾಸೂ ಫ್ಯಾನ್‌, ಏರ್‌ ಕಂಡೀಷನ್‌, ಏರ್‌ ಕೂಲರ್‌ ಬಳಸುತ್ತಿದ್ದರು. ಗೃಹಜ್ಯೋತಿ ಯೋಜನೆಯಲ್ಲಿ ಉಚಿತವಾಗಿ ವಿದ್ಯುತ್‌ ಸಿಗುತ್ತಿರುವ ಕಾರಣಕ್ಕೆ ಫ್ಯಾನ್‌, ಎಸಿ, ಏರ್‌ಕೂಲರ್‌ಗಳನ್ನು ಇತಿಮಿತಿಯಿಲ್ಲದೆ ಬಳಸಿದರು. ಇದರಿಂದ ವಿದ್ಯುತ್‌ ಬಳಕೆ ಪ್ರಮಾಣವು ಮೂರ್ನಾಲ್ಕು ಪಟ್ಟು ಹೆಚ್ಚಾಗಿತ್ತು. ಜೂನ್‌ ಆರಂಭದಿಂದ ಆಗಾಗ್ಗೆ ಮಳೆಯಾಗುತ್ತಿರುವ ಕಾರಣಕ್ಕೆ ತಾಪಮಾನ ಇಳಿಕೆಯಾಗಿದೆ. ಫ್ಯಾನ್‌ ಹಾಗೂ ಏರ್‌ ಕೂಲರ್‌ಗಳಿಗೆ ಬಿಡುವು ಸಿಕ್ಕಿದ್ದು, ವಿದ್ಯುತ್‌ ಬಳಕೆ ಕಡಿಮೆಯಾಗಿದೆ.
ಬಿಡಿಎ ಅಕ್ರಮ ಕೇಸ್ ಮುಚ್ಚಿಹಾಕಲು ಲಂಚ ಪಡೆದ ಆರೋಪ: ಸಿಸಿಬಿ ಅಧಿಕಾರಿ ಯತೀಶ್ ಅಮಾನತು
