ಬೆಂಗಳೂರು: ಪ್ರಸಕ್ತ ಅಕ್ಟೋಬರ್‌ ತಿಂಗಳಲ್ಲೇ ಉಪ ನೋಂದಣಾಧಿಕಾರಿ ಕಚೇರಿಗಳಲ್ಲಿಆಸ್ತಿ ನೋಂದಣಿ ಮಾಡಿಕೊಳ್ಳುವ ಉದ್ದೇಶವಿರುವವರು ತುರ್ತಾಗಿ ಅಂತಿಮ ಇ – ಖಾತಾ ಪಡೆದುಕೊಳ್ಳುವ ಸಂಬಂಧ ಬಿಬಿಎಂಪಿ ಮಾರ್ಗಸೂಚಿ ಹೊರಡಿಸಿದೆ.
ಬಿಬಿಎಂಪಿಯಿಂದ ಕರಡು ಇ-ಖಾತಾ ಮತ್ತು ಅಂತಿಮ ಇ – ಖಾತಾ ಪಡೆಯಲು ಅನುಸರಿಸಬೇಕಾದ ಕ್ರಮಗಳು, ಆನ್‌ಲೈನ್‌ನಲ್ಲಿ ಅರ್ಜಿ ಸಲ್ಲಿಸುವಿಕೆ ಹಾಗೂ ಸಲ್ಲಿಸಬೇಕಾದ ದಾಖಲೆಗಳ ಕುರಿತಂತೆ ಮಾರ್ಗಸೂಚಿಯಲ್ಲಿ ತಿಳಿಸಲಾಗಿದೆ.
ಆಸ್ತಿ ನೋಂದಣಿ ಮಾಡಿಕೊಳ್ಳಲು ಇಚ್ಛಿಸುವವರು ಎಲ್ಲದಾಖಲೆಗಳು, ಈವರೆಗಿನ ಋುಣಭಾರ ಪ್ರಮಾಣಪತ್ರದೊಂದಿಗೆ ಸಂಬಂಧಪಟ್ಟ ಸಹಾಯಕ ಕಂದಾಯ ಕಚೇರಿಗೆ ಭೇಟಿ ನೀಡಿ, ಅಲ್ಲಿನ ಸಿಬ್ಬಂದಿಯ ನೆರವಿನೊಂದಿಗೆ ಆನ್‌ಲೈನ್‌ ಅಪ್‌ಲೋಡ್‌ ಮಾಡಿ, ಒಂದೇ ದಿನದಲ್ಲಿ ನಿಯಮಾನುಸಾರ ಅಂತಿಮ ಇ-ಖಾತಾ ಪಡೆಯಬಹುದಾಗಿದೆ ಎಂದು ಮುಖ್ಯ ಆಯುಕ್ತ ತುಷಾರ್‌ ಗಿರಿನಾಥ್‌ ತಿಳಿಸಿದ್ದಾರೆ.
ಆಸ್ತಿ ನೋಂದಣಿಯ ಉದ್ದೇಶವಿಲ್ಲದವರು ಅಂತಿಮ ಇ-ಖಾತಾ ಪಡೆಯಲು ಸಹಾಯಕ ಕಂದಾಯ ಅಧಿಕಾರಿ ಕಚೇರಿಗೆ ಭೇಟಿ ನೀಡುವ ಅಗತ್ಯವಿಲ್ಲ. ಆನ್‌ಲೈನ್‌ನಲ್ಲೇ ಯಾವಾಗ ಬೇಕಾದರೂ ಅಂತಿಮ ಇ – ಖಾತಾವನ್ನು ಡೌನ್‌ಲೋಡ್‌ ಮಾಡಿಕೊಳ್ಳಬಹುದಾಗಿದೆ. ಇದಕ್ಕೆ ಋುಣಭಾರ ಪ್ರಮಾಣಪತ್ರದ (ಇಸಿ) ಅಗತ್ಯವಿಲ್ಲಎಂದು ಹೇಳಿದ್ದಾರೆ.
ಅಂತಿಮ ಇ-ಖಾತಾಗೆ ಅನುಸರಿಸಬೇಕಾದ ವಿಧಾನ:
*https://BBMPeAasthi.karnataka.gov.in ನಲ್ಲಿ ವಾರ್ಡ್‌ವಾರು ಇ – ಖಾತಾ ಪಟ್ಟಿಯಿಂದ ಕರಡು ಇ-ಖಾತಾ ಡೌನ್‌ಲೋಡ್‌ ಮಾಡಿಕೊಳ್ಳಬಹುದು.
*ಸ್ವತ್ತಿನ ಆಸ್ತಿ ತೆರಿಗೆ ರಶೀದಿಯಿಂದ ವಾರ್ಡ್‌ ಹೆಸರು ಮತ್ತು ಸಂಖ್ಯೆ ತಿಳಿದುಕೊಳ್ಳಬಹುದು.
*ಅಂತಿಮ ಇ-ಖಾತಾ ಪಡೆಯಲು ಸ್ವತ್ತಿನ ಆಸ್ತಿ ತೆರಿಗೆ ಅರ್ಜಿ ಸಂಖ್ಯೆ 10-ಅಂಕಿಗಳನ್ನು ನಮೂದಿಸಬೇಕು.
*ಮಾಲೀಕರ ಆಧಾರ್‌ ಆಧರಿತ ಇ-ಕೆವೈಸಿ (ಎಲ್ಲಆಸ್ತಿ ಮಾಲೀಕರು ಇ-ಕೆವೈಸಿ ಮಾಡಿಸಬೇಕು. ಆಧಾರ್‌ ಇಲ್ಲದವರು ಸಹಾಯಕ ಕಂದಾಯ ಅಧಿಕಾರಿ ಕಚೇರಿಗೆ ಭೇಟಿ ನೀಡಿ ಡಿಎಲ್‌, ವೋಟರ್‌ ಐಡಿ ಸಲ್ಲಿಸಿ ದೃಢೀಕರಿಸಬೇಕು), ಆಸ್ತಿಯನ್ನು ಪಡೆದ ನೋಂದಾಯಿತ ಪತ್ರ ಸಂಖ್ಯೆ (ಕ್ರಯ/ದಾನ ಪತ್ರ ಇತ್ಯಾದಿ), ಆಸ್ತಿಯ ಹಕ್ಕು ನಿರೂಪಿಸುವ ನೋಂದಾಯಿತ ಪತ್ರ, ನೋಂದಣಿ ದಿನಾಂಕದ ಒಂದು ದಿನದ ಹಿಂದಿನವರೆಗೆ ಆಸ್ತಿಯ ಋುಣಭಾರ ಪ್ರಮಾಣಪತ್ರವನ್ನು ಸಲ್ಲಿಸಬೇಕು.
*ಆಸ್ತಿಯ ಹೊರಗೆ ಹಾಗೂ ಮುಂದೆ ಮಾಲೀಕರು ನಿಂತಿರುವ ಫೋಟೊ
*ಬೆಸ್ಕಾಂನ 10 ಅಂಕಿಯ ಖಾತಾ ಐಡಿ (ಖಾಲಿ ನಿವೇಶನಕ್ಕೆ ಕಡ್ಡಾಯವಿಲ್ಲ)
ದಾಖಲೆಗಳು ಸರಿ ಇದ್ದರೆ 1 ದಿನಕ್ಕೆ ಇ ಖಾತಾ
ಈ ಎಲ್ಲ ದಾಖಲೆಗಳನ್ನು ಆನ್‌ಲೈನ್‌ ಅಪ್‌ಲೋಡ್‌ ಮಾಡಬೇಕು. ಎಲ್ಲವೂ ಸರಿಯಿದ್ದರೆ ಒಂದೇ ದಿನದಲ್ಲಿ ಸಹಾಯಕ ಕಂದಾಯ ಅಧಿಕಾರಿಗಳ ಕಚೇರಿಗೆ ಭೇಟಿ ನೀಡಿ ಅಂತಿಮ ಇ-ಖಾತಾ ಪಡೆಯಬಹುದು.
