ಕೇಂದ್ರ ಸರ್ಕಾರದ ಮಹತ್ವಾಕಾಂಕ್ಷಿ ಯೋಜನೆಗಳಲ್ಲಿ ಒಂದಾದ ಸೂರ್ಯ ಘರ್ ವಿದ್ಯುತ್ ಯೋಜನೆಗಾಗಿ ಬೆಸ್ಕಾಂ ಭರ್ಜರಿ ಸಬ್ಸಿಡಿ ಆಫರ್ ಗಳನ್ನು ನೀಡಿದೆ. ಹೌದು.. ಸೂರ್ಯಘರ್ ಯೋಜನೆಯ ಬಗ್ಗೆ ಬಹುಶಃ ಎಲ್ಲರಿಗೂ ಗೊತ್ತಿದೆ. ಕಳೆದ ಬಜೆಟ್ ನಲ್ಲಿ ಕೇಂದ್ರ ಸರ್ಕಾರ ಈ ಯೋಜನೆಯನ್ನು ಪ್ರಕಟಿಸಿತ್ತು. ಪ್ರತಿಯೊಂದು ಮನೆಯನ್ನು ವಿದ್ಯುತ್ ಸ್ವಾವಲಂಬಿಯನ್ನಾಗಿಸುವ ಮಹತ್ವಾಕಾಂಕ್ಷೆಯ ಯೋಜನೆಯಿದು. ಈ ಯೋಜನೆಯಡಿ ಪ್ರತಿ ಮನೆಯ ಮೇಲೆ ವಿದ್ಯುತ್ ಸೋಲಾರ್ ಪ್ಯಾನೆಲ್ ಗಳನ್ನು ಅಳವಡಿಸಿ ಆ ಮನೆಗೆ ಬೇಕಾದ ವಿದ್ಯುತ್ತನ್ನು ಸ್ವಯಂ ಆಗಿ ಉತ್ಪಾದಿಸಬಹುದು. ಇದಕ್ಕೆ ತಗಲುವ ಖರ್ಚಿನ ಮೇಲೆ ಸಬ್ಸಿಡಿ ಕೊಡುವುದಾಗಿ ಕೇಂದ್ರ ಸರ್ಕಾರ ಘೋಷಿಸಿತ್ತು. ಈಗ, ಬೆಂಗಳೂರು ವಿದ್ಯುತ್ ಸರಬರಾಜು ಕಂಪನಿ ನಿಯಮಿತ ಬೆಸ್ಕಾಂ ಈ ನಿಟ್ಟಿನಲ್ಲಿ ಒಂದು ಹೆಜ್ಜೆ ಮುಂದೆ ಹೋಗಿದ್ದು, ಬೆಸ್ಕಾಂ ವತಿಯಿಂದ ಸಬ್ಸಿಡಿಯನ್ನು ಘೋಷಿಸಿದೆ. ಹಾಗಾದ್ರೆ ಬೆಸ್ಕಾಂ ನೀಡಿದ ಸಬ್ಸಿಡಿ ಎಷ್ಟು. ಬ್ಯಾಂಕುಗಳಿಂದ ಸಾಲ ಸಿಗುತ್ತಾ, ಬಡ್ಡಿ ಹೇಗೆ?
ಸಬ್ಸಿಡಿ ಘೋಷಣೆಯ ಅಡಿಯಲ್ಲಿ ಸೂರ್ಯಘರ್ ಗ್ರಾಹಕರನ್ನು, ವಸತಿ ಗ್ರಾಹಕರು ಹಾಗೂ ವಾಣಿಜ್ಯ ಸಂಕೀರ್ಣ ಅಥವಾ ಅಪಾರ್ಟ್ ಮೆಂಟ್ ಗ್ರಾಹಕರು ಎಂದು ವಿಂಗಡಿಸಲಾಗಿದೆ. ವಸತಿ ಗ್ರಾಹಕರಿಗೆ 1 ಕಿಲೋ ವ್ಯಾಟ್ ವರೆಗಿನ ಸೋಲಾರ್ ಪ್ಯಾನೆಲ್ ಅಳವಡಿಸಿಕೊಳ್ಳಲು ತಗಲುವ ಖರ್ಚಿಗೆ 30 ಸಾವಿರ ರೂಪಾಯೊಗಳನ್ನು ಸಬ್ಸಿಡಿ ಘೋಷಿಸಲಾಗಿದೆ.
ಸೂರ್ಯ ಘರ್ ಯೋಜನೆಯಡಿ ಸಬ್ಸಿಡಿ ಎಷ್ಟೆಷ್ಟು?
1 ಕಿಲೋ ವ್ಯಾಟ್ ಸಾಮಾರ್ಥ್ಯದ ಸೋಲಾರ್ ಪ್ಯಾನೆಲ್ ಹಾಕಿಸಿಕೊಂಡವರಿಗೆ 30 ಸಾವಿರ ರೂಪಾಯಿ, 2 ಕಿಲೋ ವ್ಯಾಟ್ ಸೋಲಾರ್ ಪ್ಯಾನೆಲ್ ಮೇಲೆ 60 ಸಾವಿರ ರೂಪಾಯಿ ಹಾಗೂ 3 ಕಿಲೋ ವ್ಯಾಟ್ ಸೋಲಾರ್ ಪ್ಯಾನೆಲ್ ಮೇಲೆ ಹಾಕಿಸಿಕೊಳ್ಳುವವರಿಗೆ 78 ಸಾವಿರ ರೂಪಾಯಿ ಸಬ್ಸಿಡಿ ನೀಡಲಾಗುತ್ತದೆ ಎಂದು ಘೋಷಿಸಲಾಗಿದೆ..
ಯಾವ ಕಿಲೋವ್ಯಾಟ್ ಪ್ಯಾನೆಲ್‌ನಿಂದ ಎಷ್ಟು ಉತ್ಪಾದನೆ?
1 ಕಿಲೋ ವ್ಯಾಟ್ ಪ್ಯಾನೆಲ್‌ನಿಂದ ಪ್ರತಿ ತಿಂಗಳು 100 ಯೂನಿಟ್ ವಿದ್ಯುತ್ ಉತ್ಪಾದನೆಯಾಗುತ್ತದೆ. 2 ಕಿಲೋವ್ಯಾಟ್ ಪ್ಯಾನೆಲ್ ನಿಂದ 101 ರಿಂದ 200 ಯೂನಿಟ್ ಸಿಗುತ್ತದೆ ಹಾಗೂ 3 ಕಿಲೋ ವ್ಯಾಟ್ ಪ್ಯಾನೆಲ್ ನಿಂದ 201 ರಿಂದ 300 ಯೂನಿಟ್ ವಿದ್ಯುತ್ ಉತ್ಪಾದನೆಯಾಗುತ್ತದೆ. 1 ಕಿಲೋ ವ್ಯಾಟ್ ಸಾಮರ್ಥ್ಯದ ಸೋಲಾರ್ ಪ್ಯಾನೆಲ್ ಹಾಕಿಸಲು 60 ಸಾವಿರ ರೂಪಾಯಿಗಳಷ್ಟು ಹಣ ಖರ್ಚಾಗುತ್ತದೆ. ಇದರಲ್ಲಿ 30 ಸಾವಿರ ರೂಪಾಯಿ ಸಬ್ಸಿಡಿ ನೀಡಲಾಗುತ್ತದೆ ಎಂದು ಬೆಸ್ಕಾಂ ತಿಳಿಸಿದೆ. ಇನ್ನು, 2 ಕಿಲೋ ವ್ಯಾಟ್ ಸೋಲಾರ್ ಪ್ಯಾನೆಲ್ ಹಾಕಿಸಲು 1.20 ಲಕ್ಷ ರೂಪಾಯಿಗಳಿಂದ 1.60 ಲಕ್ಷ ರೂಪಾಯಿಗಳವರೆಗೆ ಖರ್ಚಾಗಲಿದ್ದು, ಸರ್ಕಾರದಿಂದ 60 ಸಾವಿರ ರೂಪಾಯಿ ಸಬ್ಸಿಡಿ ಸಿಗುತ್ತದೆ. ಇನ್ನು, 3 ಕಿಲೋ ವ್ಯಾಟ್ ಸಾಮರ್ಥ್ಯದ ಸೋಲಾರ್ ಪ್ಯಾನೆಲ್ ಗಳನ್ನು ಹಾಕಿಸಲು 1.80 ಲಕ್ಷ ದಿಂದ 2.40 ಲಕ್ಷ ರೂಪಾಯಿ ಖರ್ಚಾಗಲಿದ್ದು, ಸರ್ಕಾರದಿಂದ 78 ಸಾವಿರ ರೂಪಾಯಿ ಸಬ್ಸಿಡಿ ಸಿಗುತ್ತದೆ.
ಉಳಿತಾಯದ ಲೆಕ್ಕ
ಸೂರ್ಯಘರ್ ಯೋಜನೆಯಡಿ ಸೋಲಾರ್ ಪ್ಯಾನೆಲ್‌ಗಳನ್ನು ಹಾಕಿಸಿಕೊಂಡ ನಂತರ ವರ್ಷದ ವಿದ್ಯುತ್ ಬಿಲ್ ನಲ್ಲಿ ಆಗುವ ಉಳಿತಾಯದ ಲೆಕ್ಕಾಚಾರವನ್ನೂ ಸಹ ಬೆಸ್ಕಾಂ ವಿವರಿಸಿದೆ. ಸೋಲಾರ್ ಪ್ಯಾನೆಲ್ ಗಳನ್ನು ಅಳವಡಿಸಿಕೊಂಡಾಗ ವಾರ್ಷಿಕ ವಿದ್ಯುತ್ ಬಿಲ್ ನಲ್ಲಿ ಸಾವಿರಾರು ರೂಪಾಯಿಗಳ ಉಳಿತಾಯವಾಗಲಿದೆ. ಇನ್ನು 2 ಕಿಲೋ ವ್ಯಾಟ್ ಸಾಮರ್ಥ್ಯದ ಸೋಲಾರ್ ಪ್ಯಾನೆಲ್ ಗಳನ್ನು ಹಾಕಿಸಿಕೊಂಡಾಗ ವಾರ್ಷಿಕವಾಗಿ 9,600 ರೂಪಾಯಿ ಉಳಿತಾಯವಾಗುತ್ತದೆ. 2 ಕಿಲೋ ವ್ಯಾಟ್ ಸಾಮರ್ಥ್ಯದ ಪ್ಯಾನೆಲ್ ಗಳನ್ನು ಹಾಕಿಸಿಕೊಂಡಾಗ 21,600 ರೂಪಾಯಿಗಳ ಉಳಿತಾಯವಾಗುತ್ತದೆ. ಇನ್ನು, 3 ಕಿಲೋ ವ್ಯಾಟ್ ಸಾಮರ್ಥ್ಯದ ಪ್ಯಾನೆಲ್ ಗಳನ್ನು ಹಾಕಿಸಿಕೊಂಡಾಗ 36,000 ರೂಪಾಯಿಗಳ ಉಳಿತಾಯವಾಗುತ್ತದೆ ಎಂದು ಬೆಸ್ಕಾಂ ಹೇಳಿದೆ.
ಬ್ಯಾಂಕುಗಳಿಂದ ಸಾಲ ಸಿಗುತ್ತಾ, ಬಡ್ಡಿ ಹೇಗೆ?
ಮನೆಯ ಮೇಲೆ ಸೋಲಾರ್ ಪ್ಯಾನೆಲ್ ಅಳವಡಿಸಲು ತಗಲುವ ಖರ್ಚಿಗಾಗಿ ಬ್ಯಾಂಕುಗಳಿಂದ ಸಾಲ ಪಡೆಯಬಹುದಾಗಿದೆ. ಜನ ಸಮರ್ಥ ಪೋರ್ಟಲ್ ಮೂಲಕ ಅರ್ಜಿ ಸಲ್ಲಿಸಿದರೆ ಮಾತ್ರ ಈ ಯೋಜನೆಗೆ ಸಾಲ ಸಿಗುತ್ತದೆ. ಈ ಯೋಜನೆಯ ಮೇಲೆ ನೀಡಲಾಗುವ ಸಾಲಕ್ಕೆ ವಾರ್ಷಿಕ ಶೇ. 7ರಷ್ಟು ಬಡ್ಡಿ ಇರಲಿದೆ. ನಿಮ್ಮ ವಿದ್ಯುತ್ ಬಿಲ್ ನಲ್ಲಿ ಆಗುವ ಉಳಿತಾಯದ ಹಣವನ್ನೇ ಬ್ಯಾಂಕ್ ಸಾಲದ ಕಂತುಗಳನ್ನಾಗಿ ಕಟ್ಟಬಹುದು.
ಮೇಲ್ಫಾವಣಿ ಮೇಲೆ ಜಾಗ ಎಷ್ಟು ಬೇಕು?
ಇಷ್ಟಾದ ಮೇಲೆ ಸೌರ ಫಲಕಗಳನ್ನು ಹಾಕಿಸಲು ಮನೆಯ ಮೇಲ್ಛಾವಣೆ ಮೇಲೆ ಎಷ್ಟು ವಿಶಾಲವಾದ ಜಾಗವಿರಬೇಕು ಎಂಬುದರ ಲೆಕ್ಕಾಚಾರವನ್ನೂ ಬೆಸ್ಕಾಂ ಕೊಟ್ಟಿದೆ. 1 ಕಿಲೋ ವ್ಯಾಟ್ ಸಾಮರ್ಥ್ಯದ ಪ್ಯಾನೆಲ್ ಗಳನ್ನು ಅಳವಡಿಸಲು 10 x 10 ಚದರಡಿ ಜಾಗ ಬೇಕಿರುತ್ತದೆ. 2 ಕಿಲೋ ವ್ಯಾಟ್ ಹಾಗೂ 3 ಕಿಲೋ ವ್ಯಾಟ್ ಪ್ಯಾನೆಲ್ ಗಳಿಗೆ ಬಹುಶಃ ಇದಕ್ಕಿಂತ ಇನ್ನೂ ಸ್ವಲ್ಪ ಹೆಚ್ಚು ಜಾಗ ಬೇಕಾಗಬಹುದು ಎಂದು ವಿವರಿಸಿದೆ.
