Greater Bengaluru News9: ಸರ್ಕಾರಕ್ಕೆ ಮತ್ತು ಬೆಸ್ಕಾಂ (BESCOM) ಅಧಿಕಾರಿಗಳಿಗೆ ಸಾರ್ವಜನಿಕರಿಂದ ಪ್ರತಿ ತಿಂಗಳು ವಿದ್ಯುತ್ ಬಿಲ್ ಹಣವನ್ನು ಬಿಡಿಗಾಸು ಬಿಡದೆ ವಸೂಲಿ ಮಾಡಲು ಇರುವ ಆತುರ, ಅವರಿಗೆ ಕನಿಷ್ಠ ಮೂಲಸೌಕರ್ಯ ಕಲ್ಪಿಸುವಲ್ಲಿ ಏಕಿಲ್ಲ? ತಾವರಕೆರೆ ವ್ಯಾಪ್ತಿಯ ಮಾಚೋಹಳ್ಳಿ ಬೆಸ್ಕಾಂ ಉಪವಿಭಾಗದಲ್ಲಿ 50 ಸಾವಿರಕ್ಕೂ ಹೆಚ್ಚು ಮನೆಗಳಿವೆ. ಆದರೆ, ಇಲ್ಲಿನ ಲಕ್ಷಾಂತರ ನಿವಾಸಿಗಳ ದುಸ್ಥಿತಿಯನ್ನು ನೋಡಿದರೆ ಬೆಸ್ಕಾಂ ಎಂಬ ಸಂಸ್ಥೆ ಸಂಪೂರ್ಣವಾಗಿ ನಿದ್ರಾವಸ್ಥೆಯಲ್ಲಿದೆ ಎಂಬುದು ಸ್ಪಷ್ಟವಾಗುತ್ತದೆ.
ಗ್ರಾಹಕರಿಂದ ಹಣ ಪೀಕುವುದನ್ನೇ ಕಾಯಕ ಮಾಡಿಕೊಂಡಿರುವ ಅಧಿಕಾರಿಗಳ ಬೇಜವಾಬ್ದಾರಿತನ ಹಾಗೂ ನಿರ್ಲಕ್ಷ್ಯದಿಂದಾಗಿ ಇಲ್ಲಿನ ಜನ ನಿತ್ಯ ನರಕಯಾತನೆ ಅನುಭವಿಸುವಂತಾಗಿದೆ. ವಿದ್ಯುತ್ ಇಲಾಖೆಯ ಈ ಉಡಾಫೆ ನಡವಳಿಕೆಗೆ ಕೊನೆ ಎಂದು?
ಕಡಬಗೆರೆ ಕ್ರಾಸ್, ಮಾಚೋಹಳ್ಳಿ, ಸೀಗೆಹಳ್ಳಿ ಗೇಟ್, ಜನಪ್ರಿಯ ಅಪಾರ್ಟ್‌ಮೆಂಟ್, ಬೈಂದಳ್ಳಿ ಸೇರಿದಂತೆ ಸುತ್ತಮುತ್ತಲಿನ ಹಲವಾರು ಪ್ರದೇಶಗಳಲ್ಲಿ ಬೆಸ್ಕಾಂ ಕನಿಷ್ಠ ಮಟ್ಟದ ಮೂಲಸೌಕರ್ಯಗಳನ್ನು ಒದಗಿಸದೇ ಕೈಚೆಲ್ಲಿ ಕುಳಿತಿದೆ. ಹೊಸ ಬಡಾವಣೆಗಳು ಬೆಳೆಯುತ್ತಿದ್ದರೂ, ಜನಸಂಖ್ಯೆ ಹೆಚ್ಚುತ್ತಿದ್ದರೂ ಅದಕ್ಕೆ ತಕ್ಕಂತೆ ವಿದ್ಯುತ್ ಜಾಲವನ್ನು ಮೇಲ್ದರ್ಜೆಗೇರಿಸುವ ಸೌಜನ್ಯವೂ ಇಲಾಖೆಗೆ ಇಲ್ಲವಾಗಿದೆ. ಬೆಸ್ಕಾಂನ ಈ ದರಿದ್ರ ವ್ಯವಸ್ಥೆಯಿಂದಾಗಿ ಇಡೀ ಭಾಗದ ಜನರು ನಿತ್ಯ ವಿದ್ಯುತ್ ಅಭಾವ ಹಾಗೂ ತಾಂತ್ರಿಕ ತೊಂದರೆಗಳಿಂದಾಗಿ ಪರದಾಡುವಂತಾಗಿದೆ. ಜನರಿಂದ ವಿದ್ಯುತ್ ದರ ವಸೂಲಿ ಮಾಡುವಾಗ ತೋರುವ ಶ್ರದ್ಧೆಯನ್ನು, ಅವರಿಗೆ ತಡೆರಹಿತ ವಿದ್ಯುತ್ ನೀಡುವಲ್ಲಿ ಬೆಸ್ಕಾಂ ಏಕೆ ತೋರುತ್ತಿಲ್ಲ ಎಂಬುದು ನಿವಾಸಿಗಳ ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ.
ಇಲ್ಲಿನ ಬೆಸ್ಕಾಂ ಅಧಿಕಾರಿಗಳ ಅಕ್ರಮ ಹಾಗೂ ವೈಫಲ್ಯಕ್ಕೆ ಅತ್ಯಂತ ದೊಡ್ಡ ಸಾಕ್ಷಿಯೆಂದರೆ ಟ್ರಾನ್ಸ್‌ಫಾರ್ಮರ್‌ಗಳ ವಿಪರೀತ ಓವರ್‌ಲೋಡ್! ಹೊಸದಾಗಿ ಮನೆ ಕಟ್ಟುವವರಿಂದ ವಿದ್ಯುತ್ ಸಂಪರ್ಕಕ್ಕಾಗಿ ಅರ್ಜಿ ಸ್ವೀಕರಿಸಿ, ಲಕ್ಷಾಂತರ ರೂಪಾಯಿ ಹಣವನ್ನು ಖಾತೆಗೆ ಜಮೆ ಮಾಡಿಸಿಕೊಳ್ಳುವ ಬೆಸ್ಕಾಂ, ಹೊಸ ಟ್ರಾನ್ಸ್‌ಫಾರ್ಮರ್ ಹಾಗೂ ಕಂಬಗಳನ್ನು ಅಳವಡಿಸುವ ಸೌಜನ್ಯವನ್ನೇ ತೋರುತ್ತಿಲ್ಲ. ಬದಲಿಗೆ, ಈಗಾಗಲೇ ಸಾಮರ್ಥ್ಯ ಮೀರಿ ಕೆಲಸ ಮಾಡುತ್ತಿರುವ ಹಳೆಯ ಟ್ರಾನ್ಸ್‌ಫಾರ್ಮರ್‌ಗಳಿಗೇ ಸಾಲು ಸಾಲಾಗಿ ಹೊಸ ಸಂಪರ್ಕಗಳನ್ನು ಜೋಡಿಸುತ್ತಿದ್ದಾರೆ. ಉದಾಹರಣೆಗೆ ಒಂದು ಟ್ರಾನ್ಸ್‌ಫಾರ್ಮರ್‌ನಲ್ಲಿ 100 ಮನೆಗಳಿಗೆ ಸಂಪರ್ಕ ಕಲ್ಪಿಸಬೇಕಿದ್ದರೆ, 200ಕ್ಕೂ ಅಧಿಕ ಮನೆಗಳಿಗೆ ಅಕ್ರಮವಾಗಿ ಲಿಂಕ್ ನೀಡಲಾಗುತ್ತಿದೆ. ಇದು ಇಲಾಖೆಯ ಅತಿಯಾದ ದುರಾಸೆ ಹಾಗೂ ಭ್ರಷ್ಟಾಚಾರಕ್ಕೆ ಹಿಡಿದ ಕನ್ನಡಿಯಾಗಿದೆ.
ಈ ಅತಿಯಾದ ಓವರ್‌ಲೋಡ್‌ನಿಂದಾಗಿ ಇಡೀ ಭಾಗದಲ್ಲಿ ಪ್ರತಿದಿನ ‘ವೋಲ್ಟೇಜ್ ಪ್ರಾಬ್ಲಮ್’ ಮನೆಮಾಡಿದೆ. ಮನೆಯಲ್ಲಿರುವ ಟಿವಿ, ಫ್ರಿಡ್ಜ್, ವಾಷಿಂಗ್ ಮೆಷಿನ್‌ನಂತಹ ದುಬಾರಿ ಎಲೆಕ್ಟ್ರಾನಿಕ್ ಉಪಕರಣಗಳು ಶಾರ್ಟ್ ಸರ್ಕ್ಯೂಟ್ ಹಾಗೂ ವೋಲ್ಟೇಜ್ ವ್ಯತ್ಯಾಸದಿಂದಾಗಿ ಸುಟ್ಟು ಬೂದಿಯಾಗುತ್ತಿವೆ. ಸರಿಯಾದ ಬೆಳಕಿಲ್ಲದೆ ಮಕ್ಕಳು ಓದಲು ಪರದಾಡುತ್ತಿದ್ದರೆ, ವೃದ್ಧರು ಕಾಡು ಸೆಖೆಯಲ್ಲಿ ನರಳುತ್ತಿದ್ದಾರೆ. ಆದರೆ, ಈ ಯಾವುದೇ ತೊಂದರೆಗಳನ್ನು ಗಣನೆಗೆ ತೆಗೆದುಕೊಳ್ಳದ ಬೆಸ್ಕಾಂ, ಪ್ರತಿ ತಿಂಗಳು ಬಿಲ್ ನೀಡಿ ಹಣ ವಸೂಲಿ ಮಾಡುವಲ್ಲಿ ಮಾತ್ರ ಯಾವುದೇ ಕರುಣೆ ತೋರಿಸುತ್ತಿಲ್ಲ. ಸಾರ್ವಜನಿಕರ ತಾಳ್ಮೆಯನ್ನು ಪರೀಕ್ಷಿಸುತ್ತಿರುವ ಬೆಸ್ಕಾಂ ಅಧಿಕಾರಿಗಳು ತಕ್ಷಣವೇ ಎಚ್ಚೆತ್ತುಕೊಂಡು ಮಾಚೋಹಳ್ಳಿ ಉಪವಿಭಾಗದಲ್ಲಿ ಹೊಸ ಟ್ರಾನ್ಸ್‌ಫಾರ್ಮರ್‌ಗಳನ್ನು ಅಳವಡಿಸಿ ಮೂಲಸೌಕರ್ಯ ಸರಿಪಡಿಸದಿದ್ದರೆ, ಉಗ್ರ ಸಾರ್ವಜನಿಕ ಪ್ರತಿಭಟನೆ ಎದುರಿಸುವುದು ನಿಶ್ಚಿತ.
