Greater Bengaluru News9: ರಾಜ್ಯದಲ್ಲಿ ನಗರಾಭಿವೃದ್ಧಿ ಮತ್ತು ಭೂ ಬಳಕೆಯ ಯೋಜನೆಯಲ್ಲಿ ಪ್ರಮುಖ ಬದಲಾವಣೆ ತರಲು ಮುಂದಾಗಿರುವ ಕರ್ನಾಟಕ ಸರ್ಕಾರವು, ಸ್ಥಳೀಯ ಯೋಜನಾ ಪ್ರಾಧಿಕಾರಗಳ ವಲಯ ನಿಯಮಾವಳಿಗಳಿಗೆ (Zoning Regulations) ತಿದ್ದುಪಡಿ ತರಲು ಕರಡು ಅಧಿಸೂಚನೆಯನ್ನು ಹೊರಡಿಸಿದೆ. ನಗರಾಭಿವೃದ್ಧಿ ಇಲಾಖೆಯು ಅಕ್ಟೋಬರ್ 9, 2026 ರಂದು ನಂ. UDD 24 TTP 2025(E) ಸಂಖ್ಯೆಯಡಿ ಈ ವಿಶೇಷ ರಾಜ್ಯಪತ್ರವನ್ನು ಪ್ರಕಟಿಸಿದ್ದು, ಜಲಮೂಲಗಳ ಸುತ್ತ ಏಕರೂಪದ ಬಫರ್ ಝೋನ್ (Buffer Zone) ನಿಗದಿಪಡಿಸುವುದು ಇದರ ಮುಖ್ಯ ಉದ್ದೇಶವಾಗಿದೆ. GBA, BDA, BMRDA ಮತ್ತು BMICAPA ಪ್ರದೇಶಗಳನ್ನು ಹೊರತುಪಡಿಸಿ ಉಳಿದ ಎಲ್ಲ ಅಂಗೀಕೃತ ಮಾಸ್ಟರ್ ಪ್ಲಾನ್‌ಗಳಿಗೆ ಈ ನೂತನ ನಿಯಮಾವಳಿಗಳು ಅನ್ವಯವಾಗಲಿವೆ.
ಕರ್ನಾಟಕ ನಗರ ಮತ್ತು ಗ್ರಾಮಾಂತರ ಯೋಜನೆ ಕಾಯ್ದೆ 1961ರ ಸೆಕ್ಷನ್ 13-E ಅಡಿಯಲ್ಲಿ ಈ ಹೊಸ ಕರಡು ನಿಯಮಾವಳಿಗಳನ್ನು ರೂಪಿಸಲಾಗಿದೆ. ಈ ತಿದ್ದುಪಡಿಗಳಿಗೆ ಸಂಬಂಧಿಸಿದಂತೆ ಸಾರ್ವಜನಿಕರು ಅಥವಾ ಸಂತ್ರಸ್ತರು ತಮ್ಮ ಆಕ್ಷೇಪಣೆಗಳು ಹಾಗೂ ಸಲಹೆಗಳನ್ನು ಅಧಿಸೂಚನೆ ಪ್ರಕಟಗೊಂಡ 30 ದಿನಗಳ ಒಳಗಾಗಿ ವಿಕಾಸ ಸೌಧದಲ್ಲಿರುವ ನಗರಾಭಿವೃದ್ಧಿ ಇಲಾಖೆಯ ಸರ್ಕಾರಿ ಕಾರ್ಯದರ್ಶಿಯವರಿಗೆ ಸಲ್ಲಿಸಲು ಅವಕಾಶ ನೀಡಲಾಗಿದೆ. ನಿಗದಿತ 30 ದಿನಗಳ ಗಡುವಿನ ನಂತರ ಬರುವ ಯಾವುದೇ ಆಕ್ಷೇಪಣೆಗಳನ್ನು ಸರ್ಕಾರ ಪರಿಗಣಿಸುವುದಿಲ್ಲ ಎಂದು ಸ್ಪಷ್ಟಪಡಿಸಲಾಗಿದೆ.
ಹೊಸ ನಿಯಮಾವಳಿಯ ಪ್ರಕಾರ, ಕೆರೆ ಮತ್ತು ಜಲಮೂಲಗಳ ವಿಸ್ತೀರ್ಣಕ್ಕೆ ಅನುಗುಣವಾಗಿ ಬಫರ್ ಝೋನ್ ಮಿತಿಯನ್ನು ನಿಗದಿಪಡಿಸಲಾಗಿದೆ. 0.05 ಎಕರೆವರೆಗಿನ ಕೆರೆಗಳಿಗೆ ಬಫರ್ ಝೋನ್ ಇರುವುದಿಲ್ಲ (0.00 ಮೀಟರ್). 0.05 ರಿಂದ 0.10 ಎಕರೆಗೆ 1 ಮೀಟರ್, 0.10 ರಿಂದ 1.00 ಎಕರೆಗೆ 3 ಮೀಟರ್, 1.00 ರಿಂದ 10.00 ಎಕರೆಗೆ 6 ಮೀಟರ್, 10.00 ರಿಂದ 25.00 ಎಕರೆಗೆ 12 ಮೀಟರ್, 25.00 ರಿಂದ 100.00 ಎಕರೆಗೆ 24 ಮೀಟರ್ ಹಾಗೂ 100 ಎಕರೆಗಿಂತ ಹೆಚ್ಚಿನ ವಿಸ್ತೀರ್ಣದ ಕೆರೆಗಳಿಗೆ ಕಂದಾಯ ಗಡಿಯಿಂದ 30 ಮೀಟರ್ ಬಫರ್ ಝೋನ್ ಬಿಡುವುದು ಕಡ್ಡಾಯಗೊಳಿಸಲಾಗಿದೆ.
ಇದಲ್ಲದೆ ರಾಜಕಾಲುವೆ ಮತ್ತು ಚರಂಡಿಗಳನ್ನು ಪ್ರಾಥಮಿಕ (Primary), ದ್ವಿತೀಯ (Secondary) ಮತ್ತು ತೃತೀಯ (Tertiary) ಎಂದು ವರ್ಗೀಕರಿಸಲಾಗಿದೆ. ಕಂದಾಯ ದಾಖಲೆಗಳ ಪ್ರಕಾರ, ಪ್ರಾಥಮಿಕ ಕಾಲುವೆಗಳ ಇಕ್ಕೆಲಗಳಲ್ಲಿ 15.0 ಮೀಟರ್, ದ್ವಿತೀಯ ಕಾಲುವೆಗಳ ಇಕ್ಕೆಲಗಳಲ್ಲಿ 10.0 ಮೀಟರ್ ಹಾಗೂ ತೃತೀಯ ಕಾಲುವೆಗಳ ಇಕ್ಕೆಲಗಳಲ್ಲಿ 5.0 ಮೀಟರ್ ಬಫರ್ ಝೋನ್ ಕಾಯ್ದುಕೊಳ್ಳಬೇಕಾಗುತ್ತದೆ. ತೃತೀಯ ಕಾಲುವೆಗಳಿಗೆ ಸಂಪರ್ಕ ಕಲ್ಪಿಸುವ ಸಣ್ಣ ಚರಂಡಿಗಳಿಗೆ ಬಫರ್ ಝೋನ್ ಒತ್ತಾಯಿಸುವಂತಿಲ್ಲ ಎಂದು ತಿಳಿಸಲಾಗಿದೆ.
ಬಫರ್ ಝೋನ್ ಪ್ರದೇಶಗಳಲ್ಲಿ ಸಾರ್ವಜನಿಕ ಮೂಲಸೌಕರ್ಯ ಅಭಿವೃದ್ಧಿಗೆ ಸಂಬಂಧಿಸಿದಂತೆ ಕೆಲವು ನಿರ್ದಿಷ್ಟ ಚಟುವಟಿಕೆಗಳಿಗೆ ಮಾತ್ರ ಸರ್ಕಾರ ಅನುಮತಿ ನೀಡಿದೆ. ಇದರನ್ವಯ ತ್ಯಾಜ್ಯನೀರು ಸಂಸ್ಕರಣಾ ಘಟಕ (STP), ಮಧ್ಯಂತರ ಒಳಚರಂಡಿ ಪಂಪಿಂಗ್ ಸ್ಟೇಷನ್‌ಗಳು (ISPS)/ವೆಟ್ ವೆಲ್‌ಗಳು, ಒಳಚರಂಡಿ ಮತ್ತು ಕುಡಿಯುವ ನೀರಿನ ಪೈಪ್‌ಲೈನ್‌ಗಳು, ರಸ್ತೆ/ಸೇತುವೆಗಳು ಹಾಗೂ ವಿದ್ಯುತ್ ಮಾರ್ಗ ಮತ್ತು ಸಂಬಂಧಿತ ಕಾಮಗಾರಿಗಳಿಗೆ ಮಾತ್ರ ಅನುಮತಿಸಲಾಗುತ್ತದೆ. ಈ ಕರಡು ನಿಯಮಾವಳಿಯನ್ನು ರಾಜ್ಯಪಾಲರ ಆದೇಶದಂತೆ ನಗರಾಭಿವೃದ್ಧಿ ಇಲಾಖೆಯ ಅಧೀನ ಕಾರ್ಯದರ್ಶಿ ಲತಾ ಕೆ. ಅವರು ಹೊರಡಿಸಿದ್ದಾರೆ.
