Greater Bengaluru News9 : ವಿಶ್ವವಿಖ್ಯಾತ ಮೈಸೂರು ದಸರಾ 2026ರ ಉದ್ಘಾಟನಾ ವೇದಿಕೆಯಲ್ಲಿ ಕೊಪ್ಪಳದ ಗವಿಸಿದ್ದೇಶ್ವರ ಶ್ರೀಗಳು ಮಾನವೀಯತೆಯ ಮಹತ್ವ ಹಾಗೂ ಧರ್ಮದ ನೈಜ ಅರ್ಥವನ್ನು ಜಗತ್ತಿಗೆ ಸಾರಿದ್ದಾರೆ.
ಚಾಮುಂಡಿಬೆಟ್ಟದ ಪುಣ್ಯಕ್ಷೇತ್ರದಲ್ಲಿ ಚಾಮುಂಡೇಶ್ವರಿ ತಾಯಿಗೆ ಪುಷ್ಪಾರ್ಚನೆ ಸಲ್ಲಿಸಿ ಮಾತನಾಡಿದ ಅವರು, ಧರ್ಮ ಎನ್ನುವುದು ಕೇವಲ ಸ್ವರ್ಗ ತಲುಪುವ ಮಾರ್ಗವಲ್ಲ; ಬದಲಿಗೆ ಮನುಷ್ಯ ವಾಸಿಸುವ ಈ ಭೂಮಿಯನ್ನೇ ಸ್ವರ್ಗವನ್ನಾಗಿ ಪರಿವರ್ತಿಸುವುದೇ ಧರ್ಮದ ಅಂತಿಮ ಉದ್ದೇಶ ಎಂದು ತಮ್ಮ ಆಳವಾದ ಚಿಂತನೆಗಳನ್ನು ಹಂಚಿಕೊಂಡರು.
ಮಹಾನ್ ಕವಿ ಸರ್ವಜ್ಞನ ವಚನಗಳ ಉದಾಹರಣೆ ನೀಡಿದ ಶ್ರೀಗಳು, ಸರಳ ಜೀವನ ಮೌಲ್ಯಗಳೇ ನಿಜವಾದ ಧರ್ಮವೆಂದು ಮನವರಿಕೆ ಮಾಡಿಕೊಟ್ಟರು. ಬಾಯಾರಿದ ಪ್ರಾಣಿ-ಪಕ್ಷಿ ಹಾಗೂ ಮನುಷ್ಯರಿಗೆ ನೀರು ನೀಡುವುದು, ಹಸಿದ ಹೊಟ್ಟೆಗೆ ಅನ್ನ ದಾಸೋಹ ಮಾಡುವುದು ಮತ್ತು ಕಷ್ಟದಲ್ಲಿದ್ದು ಅಳುತ್ತಾ ಬರುವವರ ಕಣ್ಣೀರು ಒರೆಸಿ ಎರಡು ಪ್ರೀತಿಯ ಮಾತುಗಳನ್ನಾಡುವುದು ಶ್ರೇಷ್ಠ ಧರ್ಮದ ಲಕ್ಷಣ ಎಂದು ಅಭಿಪ್ರಾಯಪಟ್ಟರು.
ಆಧುನಿಕ ಜಗತ್ತಿನ ಸ್ವಾರ್ಥ ಮನಸ್ಥಿತಿಗೆ ಕಿವಿಮಾತು ಹೇಳಿದ ಗವಿ ಶ್ರೀಗಳು, “ಇನ್ನೊಬ್ಬರನ್ನು ತುಳಿದು ಮೇಲೆ ಬರುವುದು ಧರ್ಮವಲ್ಲ, ಬದಲಾಗಿ ಪ್ರತಿಯೊಬ್ಬರನ್ನೂ ಅರಿತು ಪರಸ್ಪರ ಪ್ರೀತಿಯಿಂದ ಜೊತೆಯಾಗಿ ಬಾಳುವುದೇ ನಿಜವಾದ ಧರ್ಮ” ಎಂದು ಪ್ರತಿಪಾದಿಸಿದರು. ಅವರ ಈ ಅರ್ಥಪೂರ್ಣ ಹಾಗೂ ಮಾರ್ಮಿಕ ಮಾತುಗಳು ದಸರಾ ಉದ್ಘಾಟನಾ ಸಮಾರಂಭಕ್ಕೆ ಆಗಮಿಸಿದ್ದ ಸಾವಿರಾರು ಭಕ್ತರ ಮನ ಮುಟ್ಟಿದವು.
