ಬಿಗ್ ಬಾಸ್ ಮಲಯಾಳಂ ಸೀಸನ್ 8ರಲ್ಲಿ ಇತಿಹಾಸದಲ್ಲೇ ಹಿಂದೆಂದೂ ಕಾಣದ ರೀತಿಯಲ್ಲಿ ಅನಿರೀಕ್ಷಿತ ಟ್ವಿಸ್ಟ್‌ಗಳ ಸುರಿಮಳೆಯಾಗಿದ್ದು, ವೀಕ್ಷಕರು ಹಾಗೂ ಸ್ಪರ್ಧಿಗಳಿಗೆ ದೊಡ್ಡ ಶಾಕ್ ನೀಡಲಾಗಿದೆ. ಒಂದೇ ದಿನ ಬರೋಬ್ಬರಿ 8 ಸ್ಪರ್ಧಿಗಳನ್ನು ಮನೆಯಿಂದ ಹೊರಗೆ ಕಳುಹಿಸುವ ಮೂಲಕ ಬಿಗ್ ಬಾಸ್ ಆಟದ ಹಾದಿಯನ್ನೇ ಸಂಪೂರ್ಣವಾಗಿ ಬದಲಾಯಿಸಿದ್ದಾರೆ.
ವಾರಾಂತ್ಯದ ಈ ವಿಶೇಷ ಸಂಚಿಕೆಯಲ್ಲಿ ಬಿಗ್ ಬಾಸ್ ನಡೆಸಿದ ಮಾಸ್ ಎವಿಕ್ಷನ್ ಘೋಷಣೆಯು ಮನೆಯಲ್ಲಿದ್ದ ಎಲ್ಲರಿಗೂ ಆರಂಭದಲ್ಲೇ ತೀವ್ರ ಆಘಾತವನ್ನುಂಟು ಮಾಡಿತ್ತು. ಇಷ್ಟು ದೊಡ್ಡ ಸಂಖ್ಯೆಯಲ್ಲಿ ಸ್ಪರ್ಧಿಗಳು ಒಂದೇ ದಿನ ಹೊರಹೋಗಲಿದ್ದಾರೆ ಎಂಬ ಕಲ್ಪನೆ ಸ್ವತಃ ಸ್ಪರ್ಧಿಗಳಿಗೂ ಇರಲಿಲ್ಲ.
ಮೊದಲಿಗೆ ಮನೆಯಲ್ಲಿಯ ವಾತಾವರಣವನ್ನು ಹಗುರಗೊಳಿಸಲು ಜನಪ್ರಿಯ ‘ಫ್ರೀಜ್ ಟಾಸ್ಕ್’ ಅನ್ನು ಆರಂಭಿಸಲಾಯಿತು. ಬಿಗ್ ಬಾಸ್ ಹೆಸರು ಹೇಳುತ್ತಿದ್ದಂತೆ ಆಯಾ ಸ್ಪರ್ಧಿಗಳು ಇದ್ದಲ್ಲಿಯೇ ಸ್ಥಬ್ದರಾಗಬೇಕಿತ್ತು ಮತ್ತು ಆರಂಭದಲ್ಲಿ ಇದನ್ನು ಎಲ್ಲರೂ ತಮಾಷೆಯಾಗಿಯೇ ಸ್ವೀಕರಿಸಿದ್ದರು.
ಆದರೆ ಕೆಲವೇ ಕ್ಷಣಗಳಲ್ಲಿ ಈ ತಮಾಷೆಯಾಟದ ಗಂಭೀರ ಮುಖ ಬಯಲಾಯಿತು. ಎಲ್ಲರನ್ನೂ ಫ್ರೀಜ್ ಮಾಡಿ ಇಟ್ಟ ಬಿಗ್ ಬಾಸ್, ಅಚ್ಚರಿಯೆಂಬಂತೆ ರಾಕೇಶ್ ಅವರನ್ನು ಮಾತ್ರ ರಿಲೀಸ್ ಮಾಡಿ ತಕ್ಷಣವೇ ಮನೆಯಿಂದ ಹೊರಹೋಗುವಂತೆ ಆದೇಶಿಸಿದರು.
ಯಾವುದೇ ಪೂರ್ವ ತಯಾರಿ ಇಲ್ಲದೆ ಮತ್ತು ಸರಿಯಾಗಿ ಸ್ನೇಹಿತರಿಗೆ ವಿದಾಯ ಹೇಳಲು ಕೂಡ ಸಮಯ ಸಿಗದೆ ರಾಕೇಶ್ ಭಾವುಕರಾಗಿ ಮನೆಯಿಂದ ಹೊರನಡೆದರು. ಬಳಿಕ ಉಳಿದ ಸ್ಪರ್ಧಿಗಳನ್ನು ರಿಲೀಸ್ ಮಾಡಿ ರಾಕೇಶ್‌ಗೆ ಅಂತಿಮ ಬೀಳ್ಕೊಡುಗೆ ನೀಡಲಾಯಿತು.
ಇಷ್ಟಕ್ಕೇ ನಿಲ್ಲದ ಬಿಗ್ ಬಾಸ್, ರಾಕೇಶ್ ನಿರ್ಗಮನದ ಬೆನ್ನಲ್ಲೇ ‘ಫ್ರೀಜ್ ಟಾಸ್ಕ್’ ಮುಂದುವರಿಸಿ ಲೋಲೆಟ್ಟಾ ಅವರೂ ಮನೆಯಿಂದ ಹೊರಡಬೇಕು ಎಂದು ಘೋಷಿಸಿದರು. ಲೋಲೆಟ್ಟಾ ಅವರೊಂದಿಗೆ ಮುನಿಸು ಹೊಂದಿದ್ದ ಅಂಜಲಿ ಈ ಬೆಳವಣಿಗೆಗೆ ವಿಭಿನ್ನವಾಗಿ ಪ್ರತಿಕ್ರಿಯಿಸಿದ್ದು ಗಮನ ಸೆಳೆಯಿತು.
ಈ ಮಾಸ್ ಎವಿಕ್ಷನ್ ಪ್ರಕ್ರಿಯೆಯಲ್ಲಿ ರಾಕೇಶ್ ಮತ್ತು ಲೋಲೆಟ್ಟಾ ಮಾತ್ರವಲ್ಲದೆ, ಸುಮೇಶ್, ಗಾಯತ್ರಿ ಸುರೇಶ್, ಜಸೀಲಾ ಪರ್ವೀನ್ ಹಾಗೂ ಶ್ರೀಲಕ್ಷ್ಮಿ ಅರಕ್ಕಲ್ ಕೂಡ ಮನೆಯಿಂದ ಅಧಿಕೃತವಾಗಿ ಹೊರಬಿದ್ದಿದ್ದಾರೆ. ಒಟ್ಟಾರೆ ಈ ಸುತ್ತಿನಲ್ಲಿ 6 ಮಂದಿ ಸ್ಪರ್ಧಿಗಳು ಆಟದಿಂದ ಹೊರಗುಳಿದಂತಾಗಿದೆ.
ಆದರೆ ಇಷ್ಟೆಲ್ಲಾ ಡ್ರಾಮಾದ ಮಧ್ಯೆ ಬಿಗ್ ಬಾಸ್ ಮತ್ತೊಂದು ರೋಚಕ ಟ್ವಿಸ್ಟ್ ನೀಡಿದ್ದು, ಮೃದುಲಾ ವಿಜಯ್ ಹಾಗೂ ಅಂಜಲಿ ಅವರನ್ನು ಕೂಡ ಮನೆಯಿಂದ ಹೊರಹಾಕಲಾಗಿದೆ ಎಂದು ಘೋಷಿಸಲಾಯಿತು. ಆದರೆ ಈ ಇಬ್ಬರ ಆಟ ಇಲ್ಲಿಗೆ ಮುಗಿದಿಲ್ಲದಿರುವುದು ವಿಶೇಷವಾಗಿದೆ.
ಹೊರಬಂದಂತೆ ಬಿಂಬಿಸಲಾದ ಮೃದುಲಾ ಮತ್ತು ಅಂಜಲಿಯನ್ನು ನೇರವಾಗಿ ಹೊರಗೆ ಕಳುಹಿಸದೆ, ರಹಸ್ಯವಾಗಿ ‘ಸೀಕ್ರೆಟ್ ರೂಮ್’ಗೆ ಶಿಫ್ಟ್ ಮಾಡಲಾಗಿದೆ. ಸದ್ಯ ಅಲ್ಲಿಂದಲೇ ಮನೆಯೊಳಗಿನ ಸ್ಪರ್ಧಿಗಳ ಆಟ ಹಾಗೂ ತಂತ್ರಗಾರಿಕೆಯನ್ನು ಅವರು ಸೂಕ್ಷ್ಮವಾಗಿ ಗಮನಿಸುತ್ತಿದ್ದು, ಶೀಘ್ರದಲ್ಲೇ ಗ್ರ್ಯಾಂಡ್ ರೀ-ಎಂಟ್ರಿ ಕೊಡಲಿದ್ದಾರೆ.
